[1] in gutture tuo sit tuba quasi aquila super domum Domini pro eo quod transgressi sunt foedus meum et legem meam praevaricati sunt [2] me invocabunt Deus meus cognovimus te Israhel [3] proiecit Israhel bonum inimicus persequetur eum [4] ipsi regnaverunt et non ex me principes extiterunt et non cognovi argentum suum et aurum suum fecerunt sibi idola ut interirent [5] proiectus est vitulus tuus Samaria iratus est furor meus in eis usquequo non poterunt emundari

[6] quia ex Israhel et ipse est artifex fecit illum et non est Deus quoniam in aranearum telas erit vitulus Samariae [7] quia ventum seminabunt et turbinem metent culmus stans non est in eis germen non faciet farinam quod si et fecerit alieni comedent eam [8] devoratus est Israhel nunc factus est in nationibus quasi vas inmundum [9] quia ipsi ascenderunt ad Assur onager solitarius sibi Ephraim munera dederunt amatoribus [10] sed et cum mercede conduxerint nationes nunc congregabo eos et quiescent paulisper ab onere regis et principum

[11] quia multiplicavit Ephraim altaria ad peccandum factae sunt ei arae in delictum [12] scribam ei multiplices leges meas quae velut alienae conputatae sunt [13] hostias adfer adfer immolabunt carnes et comedent Dominus non suscipiet eas nunc recordabitur iniquitatis eorum et visitabit peccata eorum ipsi in Aegyptum convertentur [14] et oblitus est Israhel factoris sui et aedificavit delubra et Iudas multiplicavit urbes munitas et mittam ignem in civitates eius et devorabit aedes illius