Deus deorum. The coming of Christ: who prefers virtue and inward purity before the blood of victims.

[1] Psalmus Asaph. Deus deorum, Dominus, locutus est, et vocavit terram a solis ortu usque ad occasum. [2] Ex Sion species decoris ejus : [3] Deus manifeste veniet; Deus noster, et non silebit. Ignis in conspectu ejus exardescet; et in circuitu ejus tempestas valida. [4] Advocabit caelum desursum, et terram, discernere populum suum. [5] Congregate illi sanctos ejus, qui ordinant testamentum ejus super sacrificia.

[6] Et annuntiabunt caeli justitiam ejus, quoniam Deus judex est. [7] Audi, populus meus, et loquar Israel, et testificabor tibi. Deus, Deus tuus ego sum. [8] Non in sacrificiis tuis arguam te; holocausta autem tua in conspectu meo sunt semper. [9] Non accipiam de domo tua vitulos, neque de gregibus tuis hircos; [10] quoniam meae sunt omnes ferae silvarum, jumenta in montibus, et boves.

[11] Cognovi omnia volatilia caeli; et pulchritudo agri mecum est. [12] Si esuriero, non dicam tibi : meus est enim orbis terrae, et plenitudo ejus. [13] Numquid manducabo carnes taurorum? aut sanguinem hircorum potabo? [14] Immola Deo sacrificium laudis, et redde Altissimo vota tua. [15] Et invoca me in die tribulationis; eruam te, et honorificabis me.

[16] Peccatori autem dixit Deus : Quare tu enarras justitias meas? et assumis testamentum meum per os tuum? [17] Tu vero odisti disciplinam, et projecisti sermones meos retrorsum. [18] Si videbas furem, currebas cum eo; et cum adulteris portionem tuam ponebas. [19] Os tuum abundavit malitia, et lingua tua concinnabat dolos. [20] Sedens, adversus fratrem tuum loquebaris, et adversus filium matris tuae ponebas scandalum.

[21] Haec fecisti, et tacui. Existimasti inique quod ero tui similis : arguam te, et statuam contra faciem tuam. [22] Intelligite haec, qui obliviscimini Deum : nequando rapiat, et non sit qui eripiat. [23] Sacrificium laudis honorificabit me; et illic iter quo ostendam illi salutare Dei.